Қазақстанда «Волонтердің цифрлық паспорты» таныстырылды
Алматыда Qazaq IT Community қоғамдық ұйымы әзірлеген «Волонтердің цифрлық паспорты» жобасының таныстырылымы өтті. Жаңа платформа волонтерлік ұйымдарға қатысушылар мен олардың қызметінің цифрлық есебін жүргізуге мүмкіндік береді. Жобаға Алматы қаласы әкімдігінің Цифрландыру басқармасы мен Жастар саясаты басқармасы қолдау көрсетті.
Іс-шара Promenade бизнес-кеңістігінде мемлекеттік құрылымдар, IT-қоғамдастық, волонтерлік ұйымдар және қоғамдық бастамалар өкілдерінің қатысуымен өтті. Таныстырылымға Алматы қаласы әкімдігінің өкілдері де қатысты.
Іс-шараға Алматы қаласы волонтерлер фронт-офисінің жетекшісі Қымбат, сондай-ақ «Нити добра», ЮНИСЕФ, «Лидер», Lider.kz және The First ұйымдары мен бастамаларының өкілдері қатысты.
Волонтерлердің үлесі көрінетін әрі өлшенетін болады
Бүгінде мыңдаған қазақстандық әлеуметтік, білім беру, экологиялық, қайырымдылық және технологиялық бастамаларға қатысады. Алайда олардың қызметі туралы мәліметтер көбіне әртүрлі ұйымдарда бөлек сақталады, ал жинаған тәжірибесі мен қосқан үлесі жүйелі түрде тіркелмейді. Енді Qazaq IT Community және серіктес ұйымдардың волонтерлері осы цифрлық құралды пайдалана алады.
Платформа:
— волонтерлік жобалар мен іс-шараларға қатысуды тіркеуге
— жетістіктер мен меңгерген дағдылар туралы ақпаратты сақтауға
— жинақталған волонтерлік тәжірибені растауға
— волонтердің цифрлық портфолиосын қалыптастыруға
— қатысушылардың ынтасын арттыруға
— волонтерлер мен ұйымдардың өзара байланысын жеңілдетуге
— ұйымдарға қажетті волонтерлерді табуға мүмкіндік береді.
Асем Болатжан, Qazaq IT Community негізін қалаушы
Волонтерлік — қоғамға көмек көрсету ғана емес, сонымен қатар көшбасшылық, ұйымдастырушылық және кәсіби дағдыларды дамытатын маңызды тәжірибе. Цифрлық паспорт волонтерлердің үлесін сақтауға, олардың нақты жетістіктерін көрсетуге және жаңа мүмкіндіктерге жол ашуға мүмкіндік береді.
Таныстырылым барысында жоба командасы платформаның тұжырымдамасы, әзірлеу кезеңдері және негізгі функциялары туралы толық ақпарат берді.
Жобаның Product Owner-і Тимур Ибрагимов өнімнің мақсатын, даму бағытын және алдағы жоспарларын таныстырды. Волонтер-әзірлеушілер Егор Сычёв пен Казбек Аскаров платформаның техникалық мүмкіндіктерін көрсетіп, волонтердің цифрлық профилі қалай қалыптасатынын түсіндірді.
Айгерім Қылыбаева, Qazaq IT Community CEO-сы
Біздің мақсатымыз — Қазақстанның әр өңіріндегі волонтерлер пайдалана алатын ыңғайлы әрі түсінікті платформа құру. Ол ақпаратты сақтап қана қоймай, волонтерлік қызметті мойындаудың, дамытудың және қолдаудың толыққанды құралына айналуы тиіс.
Келесі кезеңде платформаның функционалы одан әрі жетілдіріліп, серіктес ұйымдар қосылады және жобаны Қазақстан өңірлерінде масштабтауға дайындық жүргізіледі. Платформаны пайдалану тегін.