O‘zbekistondan IT-community: O‘zbekiston IT-hamjamiyati
Markaziy Osiyoda rivojlanish va qo‘llab-quvvatlashga hissa qo‘shayotgan IT hamjamiyatlari haqida hikoya qilishda davom etamiz. Navbatda eng mashhur hamjamiyatlardan biri — O‘zbekiston IT-hamjamiyati. Bu haqda ko‘proq maqolamizda o‘qing.
Shavkat Karimov, Toshkent shahri, IT Community of Uzbekistan rahbari, @cinedictum, itcom.uz
Hamjamiyat haqida
IT Community of Uzbekistan — bu axborot texnologiyalarini rivojlantirish va ulardan foydalanishga ixtisoslashgan, Oʻzbekiston IT-sanoatini rivojlantirish, IT-mahsulotlar va xizmatlar sifatini oshirish, tajriba va bilim almashish, mamlakatda IT-ni ommalashtirish, odamlarning hayot sifatini yaxshilash uchun innovatsion texnologiyalarni rivojlantirish maqsadida birlashgan odamlar guruhi hisoblanadi.
Bizning hamjamiyatimiz IT-mutaxassislarini mamlakat ichida va xorijda birlashtirish maqsadida tashkil etilgan. Biz jahon darajasidagi mahsulotlarni yaratishga intilamiz.
IT Community of Uzbekistan soha rivojida muhim o‘rin tutadi. Biz kasbiy aloqalarni rivojlantirish va innovatsion texnologiyalarni joriy etishga yordam beramiz.
Biz 2023-yil yanvar oyi oʻrtalarida mamlakatdagi barcha IT-mutaxassislarni, shuningdek, ushbu sohaga kirishni xohlovchilar yoki shunchaki qiziquvchilarni birlashtirish maqsadida tashkil etilganmiz.
Bir yarim yil ichida O‘zbekistondagi eng yirik va mashhur IT-hamjamiyatiga aylandik va bir nechta innovatsion loyihalarni amalga oshirdik. Ular haqida quyida mamnuniyat bilan aytib beraman.
Jamoamiz O‘zbekistonda IT-sohasini rivojlantirish uchun ixtiyoriy asosda ishlovchi 300 dan ortiq volontyorlardan iborat. Bu umumiy maqsad yo‘lida birgalikda ishlashni yoqtiradigan iste’dodli ishqibozlar uyushmasi!
Bizning asosiy maqsadlarimiz IT-ta’limni qo‘llab-quvvatlash, mutaxassislarni ishga joylashtirish, startaplar va frilanserlarga yordam berish, ilmiy va texnik tashabbuslarni rivojlantirish va turli bozor ishtirokchilari o‘rtasidagi hamkorlikni mustahkamlashni o‘z ichiga oladi.
IT Community of Uzbekistan oʻzini global IT-hamjamiyatining bir qismi sifatida namoyon etadi, shuning uchun biz milliarddan ortiq foydalanuvchiga ega boʻlgan LinkedIn xalqaro professional tarmogʻidamiz.
IT hamjamiyatining asosiy vazifalari quyidagilardan iborat:
— IT-sanoatni rivojlantirish: mahsulot va xizmatlar sifatini oshirish, yangi texnologiyalar va yechimlarni ishlab chiqish, shuningdek, hamjamiyat aʼzolarini qoʻllab-quvvatlash va oʻqitish
— bilim va tajriba almashish: biz odamlar turli xil texnik mavzularni muhokama qilishlari, maslahatlar va muammolarga yechimlar bilan bo‘lishish mumkin bo‘lgan joymiz
— texnologiyalarni qoʻllab-quvvatlash va rivojlantirish: bizning vazifamiz texnologiyalarni rivojlantirishga koʻmaklashish, yangi yechimlarni ishlab chiqish, ularni sinovdan oʻtkazish va ishlab chiquvchilarga fikr-mulohazalarini bildirishdir
— yangi texnologiyalarni ishlab chiqish: biz odamlarning hayot sifatini yaxshilaydigan innovatsion texnologiyalarni ishlab chiqishga intilamiz, sun’iy intelektning rivojlanishi ayniqsa qiziqarli bo‘ldi;
— treninglar va ko‘nikmalarni rivojlantirish: biz turli kurslar, vorkshoplar, master-klasslar, o‘quv materiallari, vebinarlar va ishtirokchilarga IT-ko‘nikmalarini rivojlantirishga yordam beradigan boshqa resurslarni taklif etamiz
— karyera va biznesga yordam: biz universitet bitiruvchilari va yosh mutaxassislarga IT-sohasida karyera, shuningdek, frilanserlik faoliyatini rivojlantirish yoki startaplarini ochish va rivojlantirishda yordam beramiz.
Bizning hamjamiyatimizda yangi narsalarni o‘rganish, bilim va tajriba bilan bo‘lishish, tajriba orttirish va karyerani rivojlantirish, aloqalar o‘rnatish va jamoa qurish, g‘oyalarni muhokama qilish va texnologik mahsulotlar yaratish, yordam, sarmoya, maslahat olish mumkin. Qizig‘i bularning barchasi bepul.
Hamjamiyat ishtirokchilari
IT hamjamiyatiga IT-mutaxassislari va IT-mutaxassisi bo‘lishni xohlovchilar kiradi va kirishlari mumkin:
— talabalar va maktab o‘quvchilari
— boshlang‘ich dastur ishlab chiquvchilar
— tajribali mutaxassislar, shuningdek, bu sohaga qiziquvchilar. Bizning eshiklarimiz hamma uchun ochiq.
IT Community of Uzbekistan hamjamiyatida allaqachon Raqamli texnologiyalar vaziri va IT Park Uzbekistan direktoridan tortib yirik tadbirkorlar, turli IT-kompaniyalarning top-menejerlari, deyarli barcha IT-universitetlar va boshqa taʼlim muassasalari rektorlari, talabalari, maktab o‘quvchilari va turli xil IT-mutaxassislaridan iborat 11 000 dan ortiq a’zo bor.
Bular dasturchilar, loyiha menejerlari, dizaynerlar, kopirayterlar, project-menejerlari, marketologlar, biznes-developerlar, jamoa rahbarlari, tadbirkorlar va boshqalar.
Hamjamiyatimizga qo‘shilish uchun LinkedIn’dagi guruhimizga qo‘shilishning o‘zi kifoya.
Hamjamiyat a’zolari uchun tadbirlar
Biz bir qator tadbirlar, konferensiyalar va xakatonlarni o‘tkazdik, jumladan:
— O‘zbekistonda va, ehtimol, jahonda birinchi GPT Xakaton — noyob vorkshoplar turkumi Learn 2 Learn
— 8000 nafar ishtirokchini jamlagan ikki kunlik IT-ekofestival
— mukofot jamg‘armasi 45 million so‘m bo‘lgan eko-xakaton
— 100 dan ortiq jamoalar va 450 dan ortiq ishtirokchilarni oʻz ichiga olgan va mukofot jamgʻarmasi 4000 dollar bo‘lgan ikki kunlik Hacknovation 2024 xakatoni
— O‘zbekiston, Qozog‘iston, Rossiya va boshqa mamlakatlardan yuzlab ishtirokchilar ishtirok etgan to‘qqiz soatlik Design Science konferens-marafoni.
Shuningdek, biz ESG loyihalarida, masalan, Botanika bog‘ini tozalash, plogging va «Blood donor day» qon donorlari kunida donorlik qilishda ishtirok etamiz.
Bizning barcha jamoat tadbirlarimiz — professional konferensiyalar, xakatonlar, ta’lim dasturlari, uchrashuvlar, shuningdek, sifatli kontent — barcha ishtirokchilar uchun bepul va ularda har kim ishtirok etishi mumkin.
Hamjamiyat rivojlanishga qanday yordam bermoqda
IT Girls loyihamiz doirasida Albison Group va Amity University bilan birgalikda 200 nafar qizni frontend dasturlash bo‘yicha uch oylik intensiv kursda o‘qitdik.
Alena Vladimirskaya va IT Park Uzbekistan bilan birgalikda biz allaqachon IT-rekruting bo‘yicha ikkita uch oylik kurslarni o‘tkazdik va ularda 30 kishi o‘qitildi. Bitiruvchilarimizning deyarli barchasi ishga joylashtirildi.
Volontyorlarimiz uchun alohida To‘raxmat To‘raxmetov, Igor Kim va Ivan Doronin kabi o‘z sohasining yetakchi mutaxassislari bilan mahorat darslarini o‘tkazdik.
Shuningdek, o‘zimizning IT Talks podkastini yozib boramiz. O‘zbekiston IT-sohasining eng qiziqarli odamlari, shuningdek, Microsoft, Amazon, Google kabi dunyoning eng mashhur texnologiya kompaniyalarida ishlovchi vatandoshlarimiz, Stenford universiteti talabalari, muvaffaqiyatli IT-tadbirkorlar va boshqa qahramonlar ishtirokida 34 ta epizodni chiqardik.
LinkedIn’dagi guruh va sahifa, shuningdek, Telegram va YouTube kanallari orqali bilim va ma’lumotlar bilan o‘rtoqlashamiz. Shu vaqt ichida biz jami 1 300 000 marta ko‘rilgan 800 ga yaqin post e’lon qildik.
Muvaffaqiyatli loyihalar
2024-yilda BRB banki, Amity University va Yandex bilan hamkorlikda 300 million so‘m mukofot jamg‘armasiga ega Fintech Hackcelerator tanlovi o‘tkazildi.
Rejalar
2024-yilning oktabridan 2025-yilning martigacha olti oylik IT Community Roadshow loyihasini amalga oshirmoqdamiz. Bunda mahorat darslari va vorkshoplar bilan mamlakatimizning barcha 14 hududini aylanib chiqamiz. Bizni sifatli ta’lim olish bo‘yicha tashabbuslarni qo‘llab-quvvatlaydigan universitetlar va tashkilotlar kutib olishadi.
Shuningdek, biz katta ta’lim loyihasiga tayyorgarlik ko‘ryapmiz, yirik bir yapon fondi bilan 10 000 kishini o‘qitmoqchimiz.
IT-Bilim va Epam Uzbekistan kompaniyalari bilan hamkorlikda 10 000 foydalanuvchiga mo‘ljallangan IT Intern loyihasini ishga tushirmoqdamiz.
Avgust oyida IT Kids eksperimental podkastini muvaffaqiyatli ishga tushirdik va Yandex va U-ENTER bilan birgalikda IT sohasida karyera boshlash bo‘yicha konferensiya o‘tkazdik.
Ambassador dasturimizni kengaytirmoqdamiz, biz allaqachon har bir mintaqada va IT bo‘yicha dars beriladigan ko‘plab universitetlarda tanishtirilib, ular bilan faol ish olib boryapmiz.
Bu yil volontyorlarni kasbiy rivojlantirishga qaratilgan Future Leaders nomli ichki malaka oshirish dasturimizni ishga tushirdik. Shuningdek, konferensiyalar, xakatonlar, uchrashuvlar, IT-debatlar, master-klasslar va kurslar rejalashtirilgan. Biz shu paytgacha erishganimiz bilan faxrlanamiz, lekin bu hali boshlanishi!
Hamjamiyatga qo‘shilish yoki hamkorlikni taklif qilishni istaganlar uchun aloqa ma’lumotlari: LinkedIn, Telegram, itcom.uz.